من سنوات كنت عايز أكتب جملة "صلاح نجم هو هيكل الصحافة التلفزيونية ولكن لا أحد من الجمهور يعرفه!".. وكنت حأكتب عن صلاح نجم من زاوية إنه تأثيره على القنوات الإخبارية التلفزيونية العربية زي تأثير محمد حسنين هيكل في الصحافة المصرية. وهنا مش المقصود بالتأثير التوجهات السياسية وإنما التأثير في الصنعة نفسها واللي هو تأثير عميق وعابر للحقب الزمنية المختلفة.
وساعتها كنت حأكتب إنه ٩٩.٩٪ في المشاهدين العرب ميعرفوش مين هو صلاح نجم (هو للدقة ١٠٠٪ من المشاهدين العرب ميعرفوش الرجل) ودي نقطة أهمية الحديث عن صلاح نجم باعتباره مؤسس الصيغة الإخبارية التلفزيونية اللي شافها المشاهدين العرب منذ انطلاق الجزيرة وبعدها العربية وبي بي سي العربي وكل القنوات الإخبارية اللي اشتغل فيها جيل من الصحفيين اللي تأثروا بصلاح نجم وتعلموا منه صنعة التلفزيون الإخباري.
أنا ما كتبتش الكلام دة وقتها لأن صلاح نجم كان مسؤول عن قناة الجزيرة الإخبارية الإنجليزي وبالتالي لسة في الملعب، فاستشعرت الحرج. ولكن لما أحمد طه في الجزيرة عمل حوار طويل يزيد على الثلاث ساعات ونصف الساعة مع صلاح نجم، فقولت دي فرصة أكتب عن صلاح نجم، خصوصاً وإنه ترك الملعب.
أولاً أحمد طه أثبت نفسه من خلال الحوار إنه مذيع شاطر لأنه عرف يخللي صلاح نجم يتكلم أكتر من ٣ ساعات ونص وهو رجل مش بس قليل الكلام ولكن صعب جداً تطلع منه بحديث يزيد عن ٣ دقائق! رجل شديد الاقتصاد في الكلام. معندوش رغبة الإسهاب أو السرد. كلامه قليل وعبارات دقيقة. فدة إنجاز إنه يكون فيه حوار طويل مع صلاح نجم واللي مفيش عنه أي معلومات إلا الحكايات والقصص اللي ممكن تسمعها من الناس اللي اشتغلوا معه خلال محطاته الكثيرة في مشواره المهني الممتد على خمسين سنة تقريباً.
ثانياً، كنت سعيد بمعرفة إنه صلاح نجم من بلديات والدي (من الزقازيق في الشرقية) وهو مش كبير في السن، حيث إنه كان في العشرينات من عمره في السبعينات. وهو أشار إلى إن الجو العام في الستينات والسبعينات دفعه إنه يكون مهتم بالصحافة ورغبته في إنه يكون صحفي. وبدأ في قسم الموجهات في الإذاعة المصرية في السبعينات حيث عمل في إذاعة تقريباً لا يسمعها أحد، وانتقل إلى البرنامج العام، وبعد فترة قليلة ترك الإذاعة وراح السعودية يشتغل لمدة سنتين مترجم في مستشفى للعيون!
وفي السعودية قدم على وظيفة في القسم العربي لإذاعة هولندا وعاش هناك ٨ سنوات قبل ما ينتقل لتجربة التلفزيون الإخباري الأول لبي بي سي عربي في ١٩٩٤ واللي انتهى في ١٩٩٦ وقامت على أنقاضه الجزيرة. وهناك في الدوحة كان له الإسهام الأكبر في صياغة شكل الجزيرة وقيادة غرفة الأخبار واختيار الكوادر هناك، وهو في الحوار لم يتحدث عن دوره إلا بشكل مختصر جداً وأنا أعرف دوره من حكايات من عملوا معه اللي هما زملائي وبيعتبروا صلاح نجم أبوهم الروحي في المهنة بسبب تأثيره العميق في مسيرتهم المهنية.
وخلال وجوده في الجزيرة انتقل لإذاعة بي بي سي العربي لست شهور (وحكايات عرفتها من الزملاء القدامى في الإذاعة) ورجع للجزيرة ثم بعد عدة سنوات رجع مرة أخرى لإذاعة بي بي سي العربي كرئيس تحرير لفترة قصيرة قبل ما يروح يأسس العربية في دبي، وبعدها يأسس الإخبارية السعودية، وبعدها يرجع للمرة الرابعة والأخيرة لبي بي سي ويأسس تجربتها التلفزيونية الثانية، وبعدها في ٢٠١٠ يروح يقود غرفة الأخبار في الجزيرة الإنجليزية لخمستاشر سنة.
أنا حضرت صلاح نجم وهو بيأسس ويدير قناة البي بي سي العربي، ولم أكن قريباً منه وما اشتغلتش معاه إلا بشكل محدود جداً، وإن كان فيه مواقف واجتماعات حضرتها له باعتباره مدير الأخبار للمنصات الثلاثة وقتها، وفي الفترة المحدودة دي كان صلاح نجم بالضبط كما سمعت عنه من الزملاء اللي اشتغلوا في التجارب اللي قبل بي بي سي. كان رجل شديد الانضباط ولديه قدرة غير عادية على التدقيق في أدق تفاصيل الشغل وحريص على السيطرة الكاملة والمركزية والتامة إنها تكون معاه. وبينجح في الإدارة الحازمة بدون ما تسمع صوته. زي ما ظهر في الحوار، صوته منخفض جداً ويبدو بارد وينطبق عليه التعبير الإنجليزي detached (منفصل شعورياً عن اللي بيحصل) لكن هو شرح دة في الحوار إن كل عصبيته وقلقه بيطلع في قبضة يده المتشبكين في بعض، وإنه مش بارد أو منفصل شعورياً ولكن هادئ ومتحكم في أعصابه لأقصى درجة علشان لا يفقد قدرته على إدارة العمل في غرفة الأخبار.
الحوار الطويل لصلاح نجم، في اعتقادي، فيه دروس لا تتوفر لأي طالب دراسات عليا في الإعلام التلفزيوني. وعلشان كدة كنت حريص أشوف الحوار في سبع جلسات وبتركيز شديد. وفيه ملاحظات ممكن تطلع بيها عن صلاح نجم، ومن أهمها إنه رجل مهني جداً وفاهم بشكل عميق صناعة الأخبار ولكن بدون ما تعرف له توجه سياسي واضح. ودة يفسر ليه كان هو الخيار الأول لأي حكومة أو جهة عايزة تعمل قناة أخبار في العالم العربي. ومن المهم لإدراك الدروس اللي بيقولها صلاح نجم في الحوار إنك تفصل بين رأيك في القنوات اللي اشتغل فيها وأدارها وبين معرفته ومهنيته. يعني ممكن تكون ما بتحبش الجزيرة أو العربية ولكن دة لا يعني إنك ما تدركش إنك قدام شخص تأثيره في المحتوى الإخباري العربي منذ سنة ١٩٩٦ كان هو التأثير الأهم والأعمق، وإن فيه فجوة كبيرة أوي بين مستواه وبين مستوى الناس اللي تولوا إدارة غرفة الأخبار في الجزيرة والعربية بعده وحضرت لهم مواقف وعرفتهم عن قرب وأثبتوا إن فعلاً الرزق بتاع ربنا سبحانه وتعالى.
خلال الحوار كان صلاح بطريقته في الكلام وهدوءه الشديد بيفكرني بأداء مارك رايلانس البديع لشخصية توماس كرومويل في المسلسل اللي أنتجته بي بي سي عن رواية هيلاري مانتل العظيمة wolf hall. فهو صلاح نجم بالإضافة إلى مهارته في صناعة الأخبار لكنه أيضاً فاهم يعني أيه إدارة والأهم إنه فاهم بعمق يعني أيه سلطة وازاي يستخدمها، وربما هي دي الحاجة الوحيدة اللي بيستمتع بيها في الحياة! ودة شيء ممكن تعرفه من لما بيقول إنه كان بيشعر بالإنجاز لما يكون واقف في غرفة الأخبار وقدامه شاشات كتير بتنقل كل القنوات الإخبارية التلفزيونية المنافسة، وهو يختار يطلع هوا على حدث معين ويلاقي كل القنوات التانية مشيت وراه وتحولت شاشتها لنفس الحدث اللي هو بينقله. (ودي شوفتها وهي بتحصل خلال وجوده في تجربة بي بي سي وهو حكاها في الحوار عن تجربته في الجزيرة وسمعتها من زميل اشتغل معاه في تجربته في العربية).
أحمد طه سأله في الحوار السؤال اللي ممكن ييجي على بال أي شخص بيشوف الحوار ويكتشف إن صلاح نجم أسس الجزيرة وبعدها أسس القناة اللي كانت بتعتبر منافستها لعدة سنوات وهي العربية، وازاي قدر ينتقل في العمل بين محطات تحمل أجندات إخبارية قد تبدو متناقضة في أحيان كثيرة، وهو كان رده إنه هيكل انتقل من الأخبار لآخر ساعة للأهرام وفضل مؤثر في كل مكان يعمل فيه، أو ما يمكن فهمه باعتباره إن الوفاء هو للمهنة وليس للمكان. ودة في النهاية أمر نسبي وقابل للتأويل، ولكن المهم هنا إن رأي الزملاء أو تأويل الناس لقرارات صلاح مش مهم بالنسبة له. هو رجل يمكن تلخيصه في أشياء قالها وتعبر عنه بدقة.
هو قال إنه لم يصنع صداقات مع زملائه في العمل، لأن بالنسبة له الصداقة في العمل بين المدير وفريقه بتيجي على حساب العمل. ودي مدرسة في الإدارة لها منطقها. وفي نفس الوقت هو قريب من زملائه لأنه عارف قدراتهم وعارف ازاي يديهم فرص وعارف تفاصيل شغلهم، ودة مهم جداً في الإدارة. كما أنه بينسب كل نجاحاته للفرق اللي اشتغل معاها ولا يمنح نفسه أي credit. لما سأله أحمد طه، هل بعد خمسين سنة في المهنة ندم على حاجة؟ فهو بعد تنهيدة وتفكير قال إنه لم يندم على شيء. ودي شخصية صلاح نجم، دايماً بيبص لقدام وغير معني أوي بالماضي أو ما جرى فيه، وغير معني برأي الناس لأنه مدرك إنه علشان ياخد القرارات الصح، حيعمل عداوات وفيه ناس حيكون رأيها فيه سلبي، ودة بالنسبة له مش مهم. هو ينطبق عليه في الحتة دي تحديداً أغنية فرانك سيناترا الشهيرة I did it my way.
طب هل مشاهدة الحوار مهمة ومليئة بالدروس؟ نعم الحوار مهم جداً وكله دروس شديدة الأهمية في صناعة الأخبار وفي الإدارة، ولكن هل ممكن تكرار تجربة صلاح نجم؟ لا مش ممكن تكرار تجربة صلاح نجم، لأن ببساطة هو ابن زمن وسياق سمح له بالتأثير الهائل على الصنعة اللي هي دلوقتي لم تعد بنفس أهمية وجودها في ١٩٩٦ وتقريباً لحد ٢٠٢٠. دلوقتي فيه شيء جديد بيتكون في صناعة المحتوى الإعلامي، والقنوات الإخبارية التلفزيونية أصبحت أقل أهمية من زمن تأسيسها، وفيه أجيال جديدة ما تعرفش يعني أيه تلفزيون إخباري ومش مهتمة تعرف وعندها وسائل ومنصات جديدة في معرفة الأخبار والتفاعل معها.
صلاح نجم زي هيكل، ابن لتجربة وزمن وسياق ممكن ترجع لتجاربهم باعتبارها جزء مهم من التاريخ. ولكن الفرق إن هيكل ساب كتب وأحاديث تلفزيونية ممكن ترجع لها، بينما صلاح نجم لم يكتب مذكراته ويرفض كتابتها لأنه ذكر إنه لا يزال مؤتمن على أسرار الأماكن اللي اشتغل فيها، وبالتالي ليس لدى المهتم بتاريخ الإعلام التلفزيوني العربي سوى حوار صلاح نجم مع أحمد طه واللي من المحتمل جداً للأسف ألا يتكرر.
