Friday 18 October 2019

الصوت الأعلى: سيرة مؤسس فوكس نيوز

Image result for the loudest voice
فيه مسلسل مهم جداً مشاهدته لكل اللي شغالين في الإعلام التلفزيوني اسمه the loudest voice. المسلسل عن مؤسس قناة فوكس نيوز وامبراطور الإعلام التلفزيوني اليميني المحافظ في أمريكا، روجر آيلز.
روجر اشتغل مستشار إعلامي للرؤساء الجمهوريين نيكسون، رونالد ريجان، جورج بوش الأب، ومستشار في حملة ترامب وهو اللي حضر ترامب للمناظرات الرئاسية مع هيلاري وأشرف على اختيار أهم رجال حملته الانتخابية.
روجر كان شخص شديد الذكاء والفهم لفكرة الإعلام التلفزيوني ولما عمل فوكس نيوز بفلوس امبراطور الإعلام الأسترالي روبيرت ميردوخ، كان بيراهن إن فيه قنوات إخبارية تلفزيونية أمريكية كتير عندها ميل نحو الليبراليين في أمريكا بينما نصف سكان أمريكا من المحافظين ليس لديهم قناة تمثلهم. دة كان رهانه مع إن ميردوخ كان شايف إن القناة تكون متوازنة في تغطيتها علشان هو عايز يكسب من وراه نفوذ في أمريكا. طبعاً رهان روجر نجح ووصل القناة إنها تعمل أرباح تفوق ٢ مليار دولار في السنة!
روجر بالإضافة إلى ذكائه الشديد وإدارته لفوكس نيوز، كان منحط وكداب وحقير. من الناحية الصحفية كان بيؤمن إنه هو لا يغطي الأخبار ولكن يصنع الأخبار حتى لو كانت مفبركة، في سبيل تمرير رسالته الأيدولوجية. كان عنصري وعنده مشكلة مباشرة في وجود السود والمسلمين وشايف إن أمريكا هي أرض للمتدينين البيض فقط.
على الصعيد الشخصي كان بيستغل سلطته كرئيس للقناة في التحرش الجنسي وفرض نفسه على المذيعات وعلى اللي شغالين معاه علشان يناموا معاه لو عايزين أي تقدم وظيفي! كان بيتعامل مع الستات في القناة زي الوجبات السريعة، طالما دفع لها مرتبها يبقى من حقه ياكلها في الوقت اللي هو عايزه، حتى لو على غير إرادتها! كان نظرته للمرأة إنها مجرد أداء لجذب المشاهدين جنسياً. علشان كدة كل مذيعات فوكس كان بيختارهم بيض ويلبسهم قصير جداً علشان أفخاذهم تظهر للمشاهد، اللي هو المفروض أبيض محافظ متدين!
كانت وجهة نظره اللي قالها لإحدى المذيعات اللي سجلت كلامه ورفعت عليه قضية بعد كدة، إن المذيعات لازم يظهروا للمشاهد الرجل المحافظ علشان يتخيلهم جنسياً وهو بيتفرج على القناة وقاعد على الكنبة جنب مراته وعياله!!
كان بيكره أوباما جداً وبيصفه إنه أسود مسلم من كينيا ولا يستحق دخول البيت الأبيض المخصص للبيض المحافظين فقط! روجر شخصياً سبب رئيسي في وصول ترامب للبيت الأبيض وفي صعود اليمين المحافظ بشكل مهيمن في الحياة السياسية الأمريكية المعاصرة.
فوكس نيوز فضلت تغطي على فضايحه وفضايح مذيع روجر المفضل بيل أورايلي لسنوات ودفع تعويضات لضحاياهم من الستات، لحد ما مذيعة اسمها جريتشن كارلسون رفعت عليه قضية بعد ما سجلت له من خلال موبايلها أكثر من عشرين ساعة من الكلام معاها في جلسات خاصة وهو بيقولها: المفروض يكون بيننا علاقة جنسية وننام مع بعض علشان مشاكل الشغل تتحل!
مذيعة روجر المفضلة ميجن كيلي اللي كان بيستخدمها لضرب جريتشن كارلسون، طلعت هي كمان واتكلمت عن تاريخ تحرشاته الجنسية بيها. روبيرت ميردوخ قرر يشكل لجنة تحقيق داخلية واللي اكتشفت تاريخ مذهل وحافل من التحرش الجنسي والاستغلال الجنسي من قبل روجر آيلز بحق المذيعات والموظفات وقرر يدي مهلة لروجر لحد يوم ١ أغسطس ٢٠١٦، يا إما يستقيل أو يطرد. روجر قرر الاستقالة واستلم من فوكس شيك بقيمة ٤٠ مليون دولار! ودفعت فوكس لجريتشن تعويض ٢٠ مليون دولار واعتذار علني في مقابل إنها تسحب قضيتها وما تكتبش أو تتكلم عن اللي حصل معاها! بعدها روجر اشتغل في حملة ترامب ووصله للبيت الأبيض!
المسلسل عظيم في سرد حكاية روجر وفوكس لحد سقوطه من القناة ووفاته في ١٨ مايو ٢٠١٧. اللي بيلعب دور روجر الممثل النيوزلندي راسل كرو، واللي عمل دور مذهل في تجسيد روجر لدرجة إنه صعب جداً معرفة إن دة رسل كرو بتاع فيلم "ذا جلادياتور"..
المسلسل مبني على كتاب صحفي أمريكي اسمه جابرييل شيرمان واسمه The Loudest Voice in the Room: How the Brilliant, Bombastic Roger Ailes Built Fox News - and Divided a Country والكتاب طلع في ٢٠١٤ في عز ما كان روجر على قمة هرم فوكس نيوز.
المسلسل سبع حلقات وضروري جداً يتشاف للمهتم بتاريخ أمريكا المعاصر أو المهتم بالإعلام التلفزيوني.

No comments:

Post a Comment