ليه بعض الناس بتحط ديانتها في البيو بتاع تويتر؟ البيو دة مش بطاقة شخصية لإثبات حقك في الميراث أو لو أمين شرطة وقفك في كمين تطلعهولو #سو_ويرد
ليه فيه ناس بتحط في البيو بتاع تويتر حالتها الاجتماعية وإذا كانت متزوجة أم ربة منزل أم تجيد عمل محشي ورق العنب! تويتر مش فرح بنت عمك شاهينام
مش عارف ليه حاسس إن الناس فاهمة تويتر إنه ممكن يجيبلها عريس أو شغل أو وظيفة مع مرشح محتمل لو بقى رئيس وممكن تعاير بيه بنت خالتها في النادي!!
أظرف بيو في تويتر هي بتاعة المهندسين! نص اللي أعرفهم بيحطوا أول حاجة في البيو: مهندس ميكانيكي وأدعم البرادعي وإذا لم يتوفر أدعم أبو الفتوح..!
برضه باحب البيو اللي محطوط من بنات كتير وبيقول: برادعوية.. 23 سنة.. جميلة وأحب الرومانسية.. لن أرد على أي دي إم من شاب غير برادعوي.. أي لاف النادي الأهلي
باستظرف برضه البيو بتاع بعض البنات اللي بيحطوا فيه دباديب ووجوه صفرا وحمرا بتضحك وتحس إنك بتبص على الإزاز الوراني بتاع كيا كوبيه لونها أحمر!
وأكتر بيو أومليت بتاعة: بلطجي وفي الطريق كي أصبح طرف تالت! أو: بلطجية واللي حيقرب مني حاكله! تحس إنك دخلت حضانة تعيسة في شارع ضلمة آخره كشك!
وبرضه من البيو الأومليت: محلل ومفكر استراتيجي، يحلل بعمق أبعاد البحار ويفكر بالليل في القمر والنجوم! فاضل يحط رقم موبايله ويقول: للجادات فقط
برضه من البيو الأومليت البيو اللي يكون فيه ذكر لتوجه سياسي بطريقة مهينة للاتجاهات التانية، زي: سلفي وأكره البرادعي وبنو علمان يا ابن المرة!
ومن البيو اللي بتوقف عندها كتير لما ألاقي واحد كاتب بالانجليزي: engineer, astronaut, & MMD certified with FSD from USA & PHDZ member, Shobra
ومن البيو الطريفة أيضاً بيو منتشر بكثافة بيقول: photographer وحاطط صورة زلطة بالأبيض والأسود! إلا ما شوفتلك صورة واحدة عدلة على غلاف مجلة محترمة!
ومن البيو اللي بخاف منها بيو فيه أفاتار لرجل تخين وأبيضاني في الخمسين وكاتب: CEO of Bolbol investment fund & looking for a pretty assistant!
ومؤخراً انتشر بكثافة يا إخواني بدعة أن تضع كلاما بالشقلوب في البيو بتاعك أو رموزا تدل على برجك أو أشياء من هذا القبيل! لا يجوز والبيو فتنة!!
أكتر بيو أومليت هو بتاع العبد لله: نصف صحفي ونصف روائي ونصف صانع أفلام! أنا حاخليه: نصف مهندس ونصف مصوراتي ونصف برادعاوي ونصف كيلو ريش مشوية
No comments:
Post a Comment