Sunday, 12 August 2012

خربشات تويترية: مرسي يعيد مايو 1971.. والعميقة تترنح


بعد ٦ شهور من تولي المجلس العسكري السلطة بعد خلع مبارك، كان سياسيين في القاهرة بيتكلموا بشكل هامس إن أعضاء المجلس ليسوا على قلب رجل واحد!

الإخوان كانوا عارفين المعلومة دي، واشتغلوا على نار هادئة على جبهتين: ١. البحث عن حلفاء داخل المجلس أو اللعب على الخلافات بينهم ٢. البنتاجون!

اللي حصل النهاردة هو بالمسطرة اللي عمله السادات في ١٩٧١. رئيس ضعيف أمام جنرالات أقوى منه. مهادنة لمدة كي ينال جزء من شرعية شعبية. الانقلاب!

العصار هو قناة الاتصال بين وزارة الدفاع المصرية والبنتاغون وكان رأيه إن ما حصل في مصر في يناير٢٠١١ هو ثورة، بينما الآخرون كان رأيهم احتجاجات

الفريق السيسي ليس رجل الإخوان، ولكن يعلم جيدا إن الطريق الى الكرسي يمر عبر إقالة طنطاوي وعنان. إذن فمرسي هو الرئيس الذي يمكن أن يحقق أمنيته!

ما حدث النهاردة: بعد عشرات الاجتماعات السرية بين مثلث الاخوان-العصار والسيسي-جنرالات البنتاغون، تم الاتفاق على مذبحة القلعة، نسخة صيف ٢٠١٢..

ما حدث هو انقلاب من أعضاء داخل المجلس العسكري على طنطاوي وعنان، وتم الاستعانة بمرسي كواجهة دستورية للقرارات، بالاتفاق مع آبائنا في البنتاجون

مرسي اليوم أقوى وإعلان العصار والسيسي إنه كله تم بالاتفاق مع طنطاوي وعنان "كدبة" معناها: الجيش موافق على القرارات ويؤيده وانتهت حقبة كاملة..

ما حصل ليس صفقة بين الإخوان والمجلس العسكري، ويعني أن المتحالفين مع الإخوان من القوى الثورية، سيكون مصيرهم زي العرب بعد انتهاء الحرب الباردة

قريبا حصول أعضاء المحكمة الدستورية العليا على قلادة النيل وتعيينهم مستشارين لمرسي، فيما عدا تهاني الجبالي التي ستعين أول محافظ امرأة لدمياط!

الفريق السيسي والفريق صبحي مجرد كوبري برمائي انتقالي لعبور القوات الى الضفة الشرقية من الحكم! غداً ترفع الأعلام على خط بارليف الدولة العميقة

بكرة المحكمة الدستورية حتطير وحتسمعوا عن مذبحة قلعة في لاظوغلي! لكن سقوط العسكر لا يعني صعود الاخوان. هناك طرف يجب أن يتم إقصاؤه قبل التمكين

اللي ساعد مرسي في الإطاحة بطنطاوي وعنان هو مبارك! اختار قادة للجيش لا يتمتعون بأي شعبية من أجل الحفاظ على ولاء الجيش له ومنع تكرار أبوغزالة!

أشياء لن تحدث ثانية: ١.رؤية أي صورة لطنطاوي أو عنان ٢.بقاء ماسبيرو مستقلا عن توجهات الرئيس وتابعا للدفاع ٣.استمرار تورط الداخلية في الانفلات

بعد انهيار الاتحاد السوفيتي وتحول العالم من ثنائي القطبية الى عالم أحادي القطبية، ندم العرب كثيرا! فلم يعد باستطاعتهم الإفلات من قبضة واشنطن

توازن الردع بين قوتين متضادتين يعني أن هناك فرصة للقوى الضعيفة في العمل على الاصطفاف وتشكيل جبهة تلعب دور قوة ثالثة.لكن في مصر كله بالطحينة!

حوار تويتري مع الصديق بلال فضل

من يتحدثون عن أن هناك فرصة لطرح البديل.. أدعي إني قرأت شوية في تاريخ بلدنا وممكن أقولكم اللي معاه السلطة، معاه الإعلام، معاه الحشد والتضليل!

Belal Fadl ‏@belalfadl

@AhmedZaky كل دول كانوا مع مبارك نفعوه بإيه ياصديقي.هناك فرق بين إستلهام التاريخ والوقوع في أسره أو هكذا أتمنى

@belalfadl يا عم بلال أنت قاري تاريخ أحسن مني.. مبارك وقع لأن نظامه لم يجدد نفسه. اللي باتكلم عليه هو تكرار لنقلات دراماتيكية زي زيارة القدس

@belalfadl بصرف النظر عن قضايا الحريات،مكانش فيه قدرة على تطوير بديل مع ناصر أو السادات لأن كان معاهم الإعلام،يعني القدرة على الترويج والحشد

@belalfadl أنت عارف يا بلال إن الشعب المصري لا يورط نفسه أبدا في صراع على السلطة. وعلشان يتحرك لطرح بديل ينبغي يكون فيه خزان هائل من الغضب..

Belal Fadl ‏@belalfadl

@AhmedZaky برضه مع إندهاشي الدائم من إعادة التاريخ لنفسه أنا ضد الإيمان بحتمية الإعادة دايما ليك فرصة خصوصا مع معطيات العولمة متسارعة التطور

@belalfadl متفق معاك جزئيا. معطيات العولمة تغير الى مستوى ما وتقف. دة شعب قديم وشديد الدهاء في التعامل مع معادلة الحكم والاستبداد بأنواعه

Belal Fadl ‏@belalfadl

@AhmedZaky أختلف معاك لما المصريين صدقوا سعد زغلول ومصطفى النحاس ساندوهم في صراعهم على السلطة وبشراسة وساندوهم في وش الكل.المهم تشتغل

@belalfadl لأن كان فيه خزان من الغضب. والسلطة كانت قطعت الطرق مع الشعب. المرادي شبه ١٩٧١ بالمسطرة ومصر حتتغير بشكل دراماتيكي زي ما بعد ١٩٧٤

Belal Fadl ‏@belalfadl

@AhmedZaky تاريخ أمريكا اللاتينية فيه مخازي إستبداد للعسكر وتدخل أمريكاني مش ممكن ده يحصل النهارده بحذافيره هيحصل بشكل مقنع مخفف بكتير

@belalfadl متفق معاك في تشابه حالنا بما جرى في أمريكا اللاتينية. بس هنا الوضع أعقد بسبب: اسرائيل، النفط، السنة والشيعة والتجييش الطائفي..

Belal Fadl ‏@belalfadl

@AhmedZaky أسباب الغضب موجودة ولسه هتفضل بحكم تعقيدها.ومش هيزيلها إلا إن الإخوان يحلوها أو إنك كمعارض تقدم بدائل أسرع.الناس مالهاش عزيز

@belalfadl الناس حتغضب من الاخوان ولكن مش حيدخلوا تحت أي تيار بديل.اللعب على الخطر من الشرق واحتمال حرب إقليمية حيمنع الناس من تغيير القيادة

Belal Fadl ‏@belalfadl

@AhmedZaky طبعا أعقد أنا كنت باضرب لك مثل بس إنه مش هتنفع الإعادة كوبي بيست هيحصل تغيير في الأشكال بس اللي هيراهن على مصالح الناس هيكسب

@belalfadl اللعب على مصالح الناس يكسب في الديمقراطيات الغربية، مش مع حكم واخد شكل ولون ديني. إحنا امتداد لإرث معاوية في الحكم. الدين يتكلم..

Belal Fadl ‏@belalfadl

@AhmedZaky أكبر مكسب دلوقتي هو سقوط شرعية المطلق وإن كله بيلعب نسبي حتى اللي رافعين شعارات دينية.كلم الناس عن مصالحهم هتكسبهم مع مجهود طبعا

@belalfadl أكبر مكسب إن الدولة العميقة طلعت هشة واتضربت في مقتل. المعضلة ان اللي قتلها، مجهز واحدة تانية على مقاسه. إيجاد بديل أمر صعب جداً

Belal Fadl ‏@belalfadl

@AhmedZaky مش صحيح.إعمل قراية سوسيولوجية لإنحسار شعبية الإخوان للنص لمجرد أداء هزيل برلماني.كان الدين تكلم ضد شفيق.الثورة هي اللي حسمت

@belalfadl دة صحيح وقت الاستقطاب.المرادي مصر تحت قطب واحد فقط،قادر انه يلعب على مخاوف الناس من عدم الاستقرار ومن سيناريوهات إقليمية مش مريحة

Belal Fadl ‏@belalfadl

@AhmedZaky مش باقولك المعركة سهلة.أبدا بس هي كمان مش سهلة على الإخوان.زلزال السلطة أقوى من زلزال القمع وهيعمل تحولات رهيبة جواهم وهنشوف

@belalfadl لو حصلت تحولات عميقة داخلهم، ممكن ينهار شكلهم الحالي ويدخلوا في سلسلة من الانشقاقات.ودة مش في مصلحة مصر. لأن الطرف المتشدد حينتصر

Belal Fadl ‏@belalfadl

@AhmedZaky برضه مختلف الدولة العميقة مش هشة ولا اتضربت في مقتل بالعكس هتلضم على الإخوان وهتحاول تجيير الواقع الجديد لصالحها.حرب طويلة لسه .

Belal Fadl ‏@belalfadl

@AhmedZaky بيننا التاريخ أتحدى لو في طرف متشدد إنتصر في مصر.ده ضد طبيعة الأرض والشعب.حتى لو ركب لحظات بيتم تمييعه شعبيا.مصر غلابة وقلابة

Belal Fadl ‏@belalfadl

@AhmedZaky ختاما عشان ما أوجعش دماغك إوعى تفهم إني باهون من صعوبة المعركة.شايفها ممكنة لو مالعبتهاش إستقطاب ولعبتها سياسة ومصالح.والله أعلم

@belalfadl متفق معاك في صعوبة المعركة ومتفق إن الشعب لا يقبل التشدد غير لفترات مؤقتة. المشكلة إن الإقليم لا يساعد على التحول الديمقراطي..

Belal Fadl ‏@belalfadl

@AhmedZaky سعدت بالحوار معاك ياصديقي.عموما لو طلعت غلطان إبقى اقرا الفاتحة على قبري وقول كان لازم يؤمن بحتمية إعادة التاريخ لنفسه.صباح الفل

@belalfadl أنا أسعد بالحوار معاك يا بلال والفاتحة ليك وانت حي ومتألق ومنورنا دائماً بتفاؤلك الجميل وحبك الذي لا يقبل المساومة لأهل المحروسة



2 comments:

  1. وكنت عاوز تسيب تويتر يا استاذ احمد وتحرمنا من الكلام الجميل ده

    انا متفق مع وجهة نظر بلال مصر غلابة وقلابة
    الشعب طبيعته لا تسمح بقبول التشدد الا بشكل استثنائي لفترة قصيرة معطيات المنطقة لصالح الشعب وليس السلطة والتشدد ده رأي

    ReplyDelete
  2. سؤال بجد و محتاج حد بيفهم يجاوب : الناس اللى قالت ان شعبية الاخوان تراجعت علشان فى مجلس الشعب اخدوا 11 مليون وفى الرئاسة 5 مليون بس ؟

    هو مش مجلس الشعب الصوت ب 2 ! يعنى انا فى مجلس الشعب بختار 2 فئات و عمال , و لو راجعنا الاصوات هنلاقى ان العدد هوه هوه تقريبا بتغيير طفيف اوووى

    فى مجلس الشعب 10.5 مليون صوت , و فى الرئاسة الجولة الاولى 5.7 مليون صوت .. بيتهيألى كده يبقى شعبية الاخوان زادت مش نقصت !!

    ملحوظة : انا مش اخوان :)

    ReplyDelete