الانتخابات المصرية: محاولة سوستاوية للفهم ورسم المسار

جولة استكشافية  في الإنتخابات المصرية.. مع العلامة الفذ يوسف ابن الحاج سوستا 

دي أول مرة في حياتي أكتب في مدونة.. والكلام اللي جاي ده مجرد تجميع لتغريداتي بعد مؤشرات نتائج الجولة الأولى من الانتخابات الرئاسية المصرية وحالة الفزع والإحباط الثوري اللي شايفها أصابت الناس ومش لاقيلها مبرر .. لما حسيت إن الكلام كويس ولاقي قبول عند الناس على تويتر قلت يبقى يرقي إنه يتنشر في واحدة من افضل المدونات السياسية اللي بحب اتابعها.. شكرا احمد زكي.

  

ونبدأ التويتس بالترتيب : 

لأ بجد مش مصدقكم!! إيه الكآبة اللي انتوا عايشين فيها دي!! انتوا اتصدمتوا بجد؟ 

والله مش فاهم الناس اللي مصدومة.. كلنا كنا متوقعين الاعادة بين موسى ومرسي.. فرق إيه شفيق عن موسى يا جدعان؟؟ صلوا بينا عالنبي 

الناس اللي شايفة عمرو موسى مختلف عن شفيق.. معلش.. الاتنين فلول ولاد **** 

احنا مشاغبين وأحرار .. عادي يعني مفيش حاجة اتغيرت ‎:D‏ 

أنا رأيي من بداية الانتخابات إن أحسن سيناريو إن مرسي يكسب.. وتاني واحد إن شفيق يكسب.. يعني أنا سعيد جدا بالنتيجة دي 

يا جدعان مالكم والله في إيه؟ احنا مش في مصيبة ولا كارثة خالص على فكرة ‎:D‏ استهدوا بـالله واعقلوا كدة بس 

أول مرة اقولها بجد من شهور.. وعارف إني هتفحت تريقة.. بس الثورة مستمرة والله ‎:D‏ 

هو الناس فاكرة إن لو كان حمدين أو أبوالفتوح أو حتى خالد علي كسبوا.. كان هيحصل إيه؟ ‎:D‏ هنعيش في نعيم مفاجئ؟؟ 

كدة أحسن والله 

معقولة مفيش ولا إنسان غيري شايف إن النتيجة دي في مصلحتنا جدا وبكل المقاييس؟ ‎:D‏ الظاهر إني اتجننت بقى 

طب نمشيها بالعكس.. مش لو مرشح ثوري كسب كنا هنبقى بنتشقلب دلوقتي في الشوارع؟؟ ليه؟؟ كان هيعمل إيه؟؟ 

بصوا.. ايا كان مين اللي هيكسب بـاستثناء شفيق.. هيتظبط.. البلد داخلة على أيام منيلة بـنيلة وده شيء متوقع.. يبقى من مصلحتنا مانشيلش القرف 

قدامنا دلوقتي سيناريوهين.. شفيق أو مرسي.. مرسي لو كسب.. الجيش والمخابرات والفلول ورجال الأعمال مش هيسيبوه في حاله.. وهيخربوا البلد 

نكمل السيناريو.. الاخوان هيبقوا حكومة وريس وبرلمان.. مالهمش حجة في أي مصيبة تحصل في البلد.. ولازم يشتغلوا بـايدهم وسنانهم ويثبتوا نجاح 

لو الإخوان نجحوا في صنع تغير حقيقي في المجتمع المصري ساعتها.. يبقى احنا مش خسرانين حاجة حتى لو في شوية تضيق على الحريات.. بس لو فشلوا؟؟ 

يبقى كل سنة وأنتم طيبين والاخوان جماعة انتهت إلى الأبد بدون رجعة.. ده لو كملوا الاربع سنين أساسا 

نيجي بقى للسيناريو التاني.. فوز شفيق.. هيبدأ بـمرحلة ازدهار بنت **** في الأمن والأمان.. ودة الناس محتاجاه دلوقتي.. ولما ينجعص هيحل البرلمان 

ومع حل البرلمان كل سنة وانت طيب.. أهلا بالثورة الحقيقية بقى.. شئنا ام ابينا البرلمان مقبول شعبيا وأي تخبيط في الاسلاميين بالصورة دي مش مقبول 

وفي وجود شفيق.. أي نشاط ثوري هيواجه بـعنف فشيخ.. وشفيق مش هيلاقي اللي يبررله بـحجة الجيش الوطني بتاع 73 

اللي فاكر إن التاريخ تحت أي ظرف ممكن يرجع ل24 يناير يبقى مش فاهم حاجة.. الثورة مش بتتعمل في 18 يوم.. ولا حتى في سنتين.. لسة بدري جدا 

وموضوع إن الشعب كره الثورة ده مش حقيقي على الإطلاق .. الشعب كره ممارسات الثوار .. اللي احنا نفسنا كرهناها.. الصورة مش بالقتامة دي 

أنا أعرف مسيحيين انتخبوا شفيق وهم مؤمنين بالثورة جدا.. بس ليهم حسابات تانية تتعلق بالخوف من الاسلاميين ومفيش بديل.. نفس الكلام مع عمرو موسى 

نسبة المشاركة في انتخابات البرلمان كانت تقريبا مرة ونص اد المرة دي..طب محدش سأل نفسه ليه؟ في تقديري إنه كره للفلول وصدمة في الإسلاميين وعدم اقتناع بحد ثوري متاح 

الناس اللي نزلت وحرصت على المشاركة.. كام منهم ادى صوته لمرشح محسوب على الثورة؟؟ حوالي 65% من الناس.. يعني مش كارهين الثورة ولا بتاع 

من الآخر الوضع اللي احنا فيه أسوأ حاجة فيه.. إن شفيق يكسب.. هيتغير إيه؟ ولا حاجة.. هنفضل تحت حكم طنطاوي ونكمل محاولات الثورة.. بسيطة 

نوصل للسيناريو الحلم.. إن كان مرشح ثوري اللي يكسب.. دي كانت هتبقى نهاية الثورة الحقيقية.. بس كان هيبقى في امل في الاصلاح 

لو كان مرشح ثوري كسب.. حمدين أو أبوالفتوح.. كان أول مصيبة هيواجهها.. الدستور.. اللي ممكن جدا يحجم سلطاته طالما هو من برة الإخوان 

ولو عدا من كمين الدستور.. هيلبس في البرلمان.. لازم الحكومة تبقى اخوانية يا إما هيظبطوه.. ومش هيعرف ينفذ خطته.. 

ولو عدا من الدستور.. والاخوان احترموا نفسهم واشتغلوا معاه.. كل الاطراف دي هتتظبط من الأجهزة الامنية والمخابراتية اللي ولاءها لنظام مبارك 

وهيتصدرلهم مشاكل الدنيا والأخرة كل يوم.. عشان يبقى الثوريين فشلوا رسميا في كل شيء ثوري أو سياسي.. ودة سهل جدا 

طب عدى من ده كله وطلعنا عايشين الوهم.. هيعمل إيه مع العسكر؟؟ هيحاكم وزراء سوزان إزاي؟؟ وأيوه اقصد وزراء سوزان اللي محدش مسهم 

لو قلتولي هيحاكمهم ويعدمهم والكلام الجميل ده هقول لك تمام... انسي كل اللي أنا قلته وعيش في الاحلام عادي.. طب لو ماعملش كدة؟ احنا اللي هنظبطه 

يبقى في جميع الأحوال.. فوز مرشح "ثوري" في المرحلة دي.. كان هيبقى كويس في تحسين بطيء للأوضاع لكن تحت أي ظرف مش تغير جذري .. وكان هيتظبط 

والسيناريوهين اللي قدامنا دلوقتي مفيش ولا واحد فيهم كارثي للدرجة الفشيخة اللي أنا شايفها من امبارح دي!! عادي جدا على فكرة 

ومفيش حد ايا كان جبروته في الفترة الجاية هيقدر يقضي على الكتلة الثورية اللي تكونت من يادوب سنة ونص,, انسوا.. ولا هيقدروا يحبسوا ولا يغتالوا

وعموما بقى بعيدا عن الخلافات .. حملة أبوالفتوح والناس اللي تحمست لحمدين في الآخر.. لما يهدوا ويعقلوا هيبقوا كتل "سياسية" قوية جدا 

معلش تعقيب بسيط.. هو مين قال إن الثورة لازم تبقى مواجهات واشتباكات وتكسير بس؟؟؟ دي مرحلة مطلوبة ومهمة وهتيجي آه.. بس مش دي كل الثورة 

السؤال اللي عمالين تسألوه عن سبب عدم تأييد المسيحيين لحمدين بدل شفيق.. عشان هم بيدوروا على الأمان وده مش مضمون مع حمدين 

تمت.. تفائلوا يرحمكم الله.. لسة بدري قوي على النهاية

يوسف عمرو 

25-5-2012