مايكل حبيب يسألك: تحب تاخد الدوا إزاي؟

بقلم: مايكل حبيب

twitter: @maverickzz


العنوان الأصلي: بين الحقنة واللبوس..

أكتر نكتة ضحكتني بعد نتيجة المرحلة الأولى من انتخابات الرئاسة:

"الإختيار بين مرسي وشفيق زي اختيار تاخد الدوا بحقنة ولا لبوس... "

الحقيقة على قد ماضحكت, على قد ماحاجة وقفتني... المفروض كلمة دواء يكون بدالها سم... أيوه سم. 

لأن صحيح الحقنة أو اللبوس بيوجع وجع لحظي وبعدها الدوا هيشتغل وهتخف... الحقيقة إن لا مرسي ولا شفيق يعتبروا دوا للثورة, ولا لمصر... وبعد الوجع فيه موت. 

عزيزي الناخب الحيران, تعالى في السطور اللي جاية دي نعرض مع بعض شوية حقائق, وشوية افتراضات, وشوية مقارنات, ونحاول نوصل لإجابة... مين أحسن, الحقنة ولا اللبوس؟؟

مسرحية الانتخابات

الحقيقة المرة إن الانتخابات ' الديمقراطية ' مسرحية كبيرة, ومش بس في مصر... في حتت كتير قوي في العالم... اكاد أقول كل العالم. بس بلاش تعميم. 

تعالى نبص على اكبر بلد ديمقراطي في العالم, من كتر ماهو ديمقراطي, بيصدر الديمقراطية للعالم... احيانا بالحب والحنان, واحيانا غصب واقتدار... طبعا عارفين بنتكلم عن مين.. :)

ماما امريكا... 

امريكا فيها حزبين كبار, الحزب الجمهوري (تقدر تقول عليه يميني محافظ, بتوع ربنا وكده )... والحزب الديمقراطي (تقدر تقول عليه ليبرالي متحرر.. كافر يعني)... والحزبين دول مسيطرين على الحياة السياسية في امريكا من اواخر القرن ال19 أو اوائل القرن ال20

كل حزب بيمسك الحكم من 4-8 سنين, وهو وشطارته... يمسك كل حاجة (رئاسة, وشيوخ و نواب) أو حاجة وحاجة, وكده.. 

والنظام هناك بيخلي السلطات رقيبة على بعض نظريا.. يعني لو مجلس النواب اغلبه جمهوري, والرئيس ديمقراطي, عشان الرئيس يمرر مشروع قانون محتاج يخلي الجمهوريين خصومه يوافقوا عليه, والعكس صحيح... 

طبعا لو حزب منهم كوش على كل السلطات بتبقى هنياله وبيعمل اللي هو عاوزه... 

طيب هل الديمقراطية دي ناجحة في امريكا وبتعمل لصالح المواطن الأمريكي في كل حاجة ومهنياه؟ 

احيانا.. يعني لو بصينا على السنة اللي فاتت, كان في مشروع قانون اسمه SOPA & PIPA مختص بحرية تداول المعلومات على الانترنت وكان مدفوع أصلا من شركات صناعة السينما والموسيقى عشان يراقبوا المستخدمين للانترنت ويمنعوا القرصنة... 

الطريقة اللي كان مكتوب بيها مشروع القانون كانت سيئة جدا وكل الشركات الكبيرة في مجال الانترنت زي جوجل وويكيبيديا وغيرهم كانت ضدها... في الحالة دي الناخبين كلمت النواب بتوعهم ومشروع القانون ده سقط.. 

ده مثل على نجاح العملية الديمقراطية.. 

لكن مش دايما كده.. 

الحقيقة إنه في حين إن فيه حزبين, والحزبين بيتبادلوا السلطة, الحزبين هم في النهاية وجهين لعملة واحدة, بالذات في شوية قضايا كده سياستهم لا تتغير فيها... 

امثلة... 

حد كده يقولي اسم رئيس امريكي في ال50 سنة اللي فاتوا أو ابعد, من بعد الحرب العالمية التانية كان ليه موقف مختلف, ولما نقول موقف معناه فعل, مش تصريحات رنانة... 

- تجاه اللوبي الصهيوني في امريكا؟

- تجاه الاعتماد على البترول المستورد وعدم اللجوء للطاقة النظيفة إلا للشياكة؟

- تجاه إسرائيل وفلسطين؟

- تجاه صناعة السلاح و الادوية و صناعة الحروب اللي مدفوعة بصناعة السلاح والأدوية؟

- تجاه اتجاه كل الشركات الأمريكية لتصنيع منتجاتها في الصين بدل من خلق فرص عمل محلية؟

وغيره... 

اعتقد إن الاجابة لأ, وعشان مانطولش, ممكن يكون في استثناء بس الحقيقة إن في القضايا دي وغيرها, الحزبين هما وجهين لعملة واحدة, وفي الحقيقة الناخب الأمريكي معندوش أي اختيار في تحديد سياسة بلده في مايتعلق بالقضايا دي... 

يكفي إن أي مرشح بييجي من بره الحزبين دول ويعرض مثلا إنه يبطل يستورد بترول ويستثمر فلوس الحروب اللي هدفها الأساسي السيطرة على البترول (افغانستان والعراق؟) في إنه يطور الطاقة النظيفة... بياخد بعضه ويروح لأن مفيش أي حد هيمول الحملة بتاعته... دور كده على واحد اسمه رون بول (Ron Paul) و اقرأ كتابه وأنت تفهم... 

الحقيقة إن العملية الديمقراطية في امريكا اصبحت مسرحية, لاقناع الناخب إنه له صوت ودور في تحديد سياسة بلده وبالتالي تحديد مصيره ... ولكن في النهاية الإختيار دايما بيكون بين مرشحين لحزبين هم في النهاية وجهان لعملة واحدة.. 

بريطانيا نفس القصة... ودول تانية غيرهم كتير...

أنا كتبت عن امريكا لاني عشت هناك حبة و تابعت الكلام ده عن قرب... صديق تاني ليَّ عايش في بريطانيا كان كاتب كلام مشابه جدا عن العملية الديمقراطية هناك.

طب الكلام ده كله إيه علاقته بينا؟

علاقته كبيرة... 

طبعا أنت فاهم ومدرك إن امريكا ليها مصالح كتير قوي في مصر... 

وطبعا أنت فاهم ومدرك مدى علاقة المجلس العسكري بامريكا... اللي هي امتداد لعلاقة مبارك والحزب الوطني بامريكا... 

وطبعا مش محتاج افهمك إن الإخوان عشان يوصلوا للي هم فيه النهاردة خدوا مباركة ماما امريكا... إن مكنتش مصدق دور على وفود الاخوان اللي راحت امريكا, ومقابلاتهم هنا في مصر مع جون كيري وجيمي كارتر... 

خلينا نقرا الكلام اللي فوق ده كله تاني و نطلع بشوية نتايج.. 

. المجلس العسكري هو امتداد الحزب الوطني.. و بالتالي مرشح المجلس العسكري , شفيق , هو مرشح الحزب الوطني. 

. الإخوان طرحوا نفسهم بذكاء كبديل للحزب الوطني... و أن كانوا طول عمرهم عبارة عن الوجه الاخر للعملة... 

. امريكا عاوزة تحفظ على مصالحها في مصر, وفي نفس الوقت ادركت إن حكم الفرعون انتهى... تعمل إيه؟

امريكا بقى بتشتغل بقالها سنة وشوية مع المجلس العسكري والمخابرات و الإخوان في امكانية نقل المسرحية الأمريكية لمصر... 

ازاي بقى؟

تعال نعمل كيانين سياسيين كبار.. 

واحد يميني, وواحد وسطي ليبرالي.. 

ويتبادلوا الحكم كل 4-8 سنين كده ويقسموا مابينهم الشعب والشورى والرئاسة والحكومة... 

وتفضل كل الأحزاب التانية صغيرة ومهمشة... 

ويحس المواطن المصري إن في ديمقراطية, وبيختار رئيسه و مجلسه و كده... 

تفتكر شفيق بعد مايكسب الرئاسة مش هيعمل حزب أو ينضم لحزب؟

الحرية والعدالة هما الحزب اليميني... وحزب شفيق هيكون الحزب الليبرالي الوسطي.... 

ونبدل مع بعضينا.. 

طب عاوز تعرف الانقح من كده؟

شفيق هيكسب المرة دي... عشان الإخوان هيكسبوه... 

نعم؟ إنت الظاهر اتجننت... الإخوان هيكسبوا شفيق؟ ليه؟ طب مهم عندهم فرصة يكوشوا على كل السلطة؟؟؟ 

أنت ناسي إن في حكم محكمة دستورية عليا بحل البرلمان متشال في الدرج؟؟

الإخوان في وضع لا يسمح لهم إلا بانهم يسيبوا شفيق يكسب. هم أصلا رشحوا مرسي عشان شفيق يكسب... 

ازاي؟

لما الاخوان لقوا أبوالفتوح فرصه عالية, كان لازم ينزلوا قدامه مرشح من عندهم عشان ميوصلش للاعادة... 

هما كانوا عارفين إن خيرت الشاطر مينفعش يترشح, وكمان هو مش شخصية رئاسية... معندوش كاريزما و هو يبرع في العمل في الخفاء, زي عمر سليمان كده... 

فنزلوا الشاطر استبن, ومرسي مرشح أساسي... بعكس ماكلنا فاهمين. 

المجلس العسكري رد بترشيح عمر سليمان... الإخوان فهموا الرسالة ومعترضوش على منع الشاطر من الترشح... 

يعني هو كل المخالفات اللي اتعملت وقانون العزل وكل ده ممنعش شفيق, وبتاع 2000 توكيل هما اللي يمنعوا عمر سليمان؟

عمر سليمان كان رد واضح من المجلس العسكري للاخوان إن الشاطر مرفوض... 

مرسي نازل عشان يخرج أبوالفتوح وحمدين من الجولة الاولى, لأن الإخوان بخبرتهم في إدارة الانتخابات يقدروا يعملوا كده. 

الجولة التانية هيسيبوها لشفيق... 

لو مسابوهاش لشفيق, المجلس هيحللهم البرلمان, و يبقى كسبوا رئيس منزوع الصلاحيات... والنية مبيتة في الاعلان الدستوري المكمل... طبعا هما مش هبل يسيبوا البرلمان ويمسكوا في الرئيس.. 

أنا حتى سمعت إن الصفقة بتقول شفيق الرئيس, ورئيس الوزارة من الاخوان... ادينا هنشوف. 

الحقنة ولا اللبوس؟

مش فارقة الصراحة... الاتنين واحد وبين فاشية دينية وفاشية عسكرية يا قلبي لا تحزن. 

صدقني أنت دورك في الانتخابات دي إنك تنبسط وتلون صباعك ازرق, وتحس إن ليك الحق في الإختيار... 

لكن لما يكون شفيق مقدم ضده 35 بلاغ بتهم فساد و اهدار مال عم للنائب العام, ومتشالين في الدرج... و حملته عملت كل المخالفات الممكنة (دعاية خارج الميزانية المسموحة, رشاوي, دعاية في فترة الصمت, وغيره), ومرسي زيه  بالضبط, طبعا أنتم عارفين الاخوان... (دعاية دينية, رشاوي عينية وفلوس, مندوبين في اللجان بتأثر على اختيار الغلابة و المترددين بنفس الخطاب الديني هو هو أو بالفلوس... )... وكل ده اللجنة العليا لانتخابات الرئاسة سايباه, ومسكت في 2000 توكيل بتوع عمر سليمان, وجنسية أم أبواسماعيل... يبقى متقوليش إنها نزيهة... :)

وبعدين اوعى تصدق الكلام بتاع الاخوان حيقلبوها إيران والكلام ده... 

الاخوان دول ابعد مايكونوا عن الاسلام, دول رجال اعمال, جنب تجارة المال, بيتاجروا بالدين... واللي تكسب به العب به... 

تفتكر صفقة الاخوان مع امريكا تتضمن تحول مصر, اللي على حدود إسرائيل, لايران تاني؟

استبعد جدا... 

الإخوان خدوا اللي هم عاوزينه ووصلوا الحكم, تطبيق الشريعة ده هيبقى حسب المزاج والموقف... 

يا سيدي كانوا طبقوها على نفسهم الاول... كله كلام استهلاكي للبيع للشعب المتدين الغلبان... 

طب والحل؟

أنا لا ازعم إني املك الحقيقة, وممكن بعد ماتقرأ الكلام ده تقول عليَّ اهبل وعبيط... ونظرية المؤامرة كلت دماغي... 

لكن أنا كل اللي اعرفه إن سواء شفيق أو مرسي, الاتنين سم قاتل للثورة ولمصر... 

الأتنين مبارك 2 تحت التجهيز... 

الموضوع مبقاش محاولة اعادة إنتاج النظام... النظام قائم و ماتهزش... هو بس عمل عملية تجميل جامدة... :)

الكلام اللي فوق ده مش من نسج خيالي... ده متابعة للاحداث, وشوية معارف جوه الإخوان, على الجيش... يعني.. 

تاني أنا مش بزعم إني املك الحقيقة, لكن على قد مابفهم اللي كتبته ده قريب قوي من الواقع.. 

انتخب مرسي, انتخب شفيق, ابطل صوتك, قاطع... مش فارقة. المسرحية مكتوبة ونهايتها معروفة... حتى لو مرسفيق كسب. 

لينك التدوينة في فيسبوك